اسلئله شائعه عن جامعة عفت

السلام عليكم و رحمه الله  بركاته هذا تجميعي للاسئله الشائعه الاسئله هذي اغلبها جتني ع الانستقرام او الطونطر مم انا حالياً ثانيه جامعه عبل ما تدخلوا يا حلوين حكون ثالثه بإذن الله دخلت التحضيري لترم و انا حالياً استديو ٣ و كل الي عندي هو من خبرتي البسيطه في الجامعه ^^ ١- هل جامعه عفت هي الجامعه الوحيده الي تدرس هندسه معماريه؟ جامعه عفت مهي الوحيده لكن فيه جامعات جديده تدرس التخصص موجوده مثل  ١- عفت/  هندسة معمارية / جده / بنات ٣-  دار الحكمة / عماره - تصميم داخلي / جده / بنات ٤- دار العلوم / هندسة معمارية - تصميم داخلي / الرياض / اعتقد للبنات و البينين قسمين منفصلين ٥- جامعة الأمير سلطان / هندسة التصميم الداخلي  / الرياض / بنات و بنين ٦- جامعة الأمير محمد بن فهد / الخبر / هندسة تصميم داخلي / بنات و بنين متاح لهم تخصصات اخرى كالهدنسه المدنيه ٧- جامعة الأعمال والتكنولوجيا / بجده / الهندسة المدنية / مني متأكده بس اعتقد للبنين اللهم كليه الاعمال للبنات XD مجهود شخصي قد تكون فيه بعض الاخطاء صعب تكتشف الجامعه للبنين و لا للبنات و فين موقعها قد تكون فيه جامعات او كليات اخرى لكن مافي شي مصرح من وزارة التعليم العالي غي ماذكر حتى هذا التاريخ يمكن سنه سنتين قدام تتغير هذي الائحه و اي تنبيه حعدله بإذن الله ^^ و هذي الصفحه برضه فيها الجامعه و تخصصاتها للي يبغ تخصصات ثانيه http://www.mohe.gov.sa/ar/studyinside/private-higher-education/pages/listphe.aspx ٢- هل جامعت عفت تدرس هنسه معاماريه و لا عماره؟ هندسه معماريه لكن معتمده عن وزارة التربيه عماره الاختلاف انها تحت قسم الهندسه ع خلاف دار الحكمه مثلاً ٣- هل يوجد سكن في جامعه عفت؟ يب فيه سكن خاص بالطالبات في عفت و داخل الجامعه مو خارجها مثل جامعه عزوز ٤- هل ممكن اسجل في عفت قبل استلامي لشهادتي؟ يب ممكن و هذا افضل ٥- كيف الدراسه في عفت؟ الدراسه في عفت بالغة الانجليزيه كلها و مع الوقت تتعودي مهي شي مستحيل ٦- احتاج اكون اعرف ارسم عشان ادخل تخصص عماره؟ لا ما يحتاج ابداً و تتعلمي الرسم مع الوقت ٧- هل التخصص صعب و احنا يحتاج انه يكون عندنا خلفيه عن الهندسه؟ لا لا لاهذا اكثر سؤال ما حعلق يعني يا حبايبي انك تدخلي تخصص انتِ حتتعلمي مو حتعلمي كل شي حيعلموكم هو و لو فيه شي معين يطلبوا تسوا ريسيرس الي هو البحث بس يكون مدينكم عن ايش تبحثوا .. ٨- كم سنه الخطه الدراسيه للهندسه؟ ٥ سنوات بدون التحضيري و هذي الخطة هنــــا   ٩- هل التخصص صعب؟ هو شغل و حفظ و حتتعبوا لو ما كنتوا جادين التخصص متعب ما حنتناقض في الموضوع ذا و اذا تخخصوا حتعرفوا ذا الشي لكن يبغالو يا واحد يحب التخصص يا حق كرف و اي احد يقلكم غير كذا مع نفسه لكن يبقى تخصص ممتع للي يحبوه ١٠- ايش نظام الدراسه في تخصص الهندسه المعماريه؟ ملخص بسيط الدراسه حتكون ع ٥ سنوات بمعدل ١٨ ساعه لكل سمستر تقريباً و عندك كورس الاستديو الكردت له في الخطه ٥ ساعات و هو الهندسه كلها تهببي فيه ما عجبك لا تدرسين هندسه لانه كل سمستر عندك لين ما تتخرجي حتدرسي ٨ استديو كل واحد ع سمستر و بعدين سمستر بدون و الاخير استديو التخرج كل ستستر حتخرجي بشروع كامل ١١- ممكن نصيحه كيف نرتب جدولنا او اساعات؟ افضل شي من ١٢ إلين ١٤ ساعه اكثر من كذا بتتعبي لو انتِ هندسه صح ممكن تتأخري عن الخطه بس عوضي في الصيفي و اشتغلي ع نفسك لا تضغطي نفسك و اذا حسيتي انك حتهببي في الكورس سويله دروب "حذف" ١٢- ايش نظام كورس الاستديو؟ الاستديوا يندرس لين التخرج ٨ ستديوات و سمستر بدون و السمستر التخرج استديوا التخرج الاستديو الاول حتتعلموا تستسخدموا الادوات عشان تصير يدكم اخف بعدها نص الترم حيكون مشروعكم فله من دور الاستديوا الي بعده حتتعلموا الدرج و سسمتمه .. كل استديوا حتتعلوا شي جديد  كل مره حتشتغلوا ع شي اكبر فندق متحف .. ١٣- البنات في عفت ايش وضعهم هل يتنقبوا؟ للحق انا اعتقد اني كـ طالبه في عفت يخليني شي بطال XD عن نفسي اغطي وجهي و صحباتي فيه الي تتلثم و فيه الي تغطي شعرها بطرحه بس حتلاقوا عينات لا طرح و لا عبايه و الوضع عادي و الشعر مفتوح ١٤- هل فيه دكاتره رجال في الجامعه؟ يب فيه بس اغلبهم ما يظهروا كثير يا في مكاتبهم "اخر الجامعه" يا عندهم كلاسات عن نفسي ممكن اتبخطر في الممرات بدون ما اغطي شعري احط الطرحه ع كتفشي او اغطي شعري بدون وجهي بس ممكن فجاء الاقي واحد قدامي فـ صرت اغطي شعري ع القل ١٥- المستقبل الوظيفي لتخصصي؟ اولا جامعت عفت تسوي كريري داي يعني يوم المهنه فـ يجوا ناس من برا الجامعه يجوا يشوفوا و يعرضوا وظايفهم حتى البنك الاهلي و شركه عيون جو @@ يجوا حتى تخصصات مهي في الجامعه و كذا ... و ابسط شي ترا انك تشتغلي في مكتب او شركه ترا الموضوع جداً عادي ١٦- كيف يكون نظام الشغل بعد التخرج؟ اما تفكي مكتبك الخاص او تشتغلي في شركه نزول الموقع مكن و ممكن ما تنزلي حسب ايش حتشتغلي و بعض المشاريع تكون بس تنباع لشركه مقاولات و هي تصطفي مع المخططات الي في يدها ١٧- هل اسعار الجامعه غاليه؟ يب مره غاليه لكن إذا سجلتي في المنحه بإذن الله ما يصير معاك الا الخير ١٨- هل يمديني كأدبي ادخل تخصص الهندسه؟ للحق صعب عليك هو الجامعه ما عتدها مشكله التخصص الوحيد الي ما يندخل للادبي هو تخصص الكهربة غير كذا مسومح لك لكن وجهة نظري انك تاخذي في الحسبان ان فيه ماث و فيزيا حتى لو انك ما اخذتهيا في الثنوي حتاخذيها فترا صعب الامر شويتين انا صح علمي لكن للحق نيلت في الماث ١ و لسى ما خلصته لكن اذا انتِ مستعده حابه التخصص مو مجرد انك دخلتيه عشان الرسم او عشان اسمنه هندسه لاني اعرف ناس زي كذا يمديكِ  تشتغلي ع نفسك فيه لانو اعتقد كونك ما جربتي كرف العلمي حيتعبك لانو لسى الارك كرف ثاني بس اذا ناويه ع التخصص و حتشتغلي ع نفسك يمديكِ هذي نصائحي البسيطه ممكن البعض يعتقد انو نظرتي سلبيه و كذا بس للحق التخصص اذا داخلاه و السلام ما حتكملي فيه التخصص متعب و يحتاج واحد حيكرف لانو يحبه او هو اصلاً متعود ع الكرف ١٩- اي اسئله؟ ضيفوها ع التعليقات ^^